Boeresamoesas

Die volgende resep lewer ongeveer 30 samoesas. Dit kan warm of koud bedien word. Ek stel voor om dit met 'n bietjie blatjang voor te sit.Vir my is hierdie die perfekte peuselhappie om in die huis te hê op ‘n reënirige dag soos vandag.

Bestanddele:

Vulsel:

1 groot ui, fyngekap

25 ml kookolie

250 g maalvleis

10 ml matige kerriepoeier

5 ml sout

25 ml blatjang

25 ml tamatiesous

25 ml mielieblom

Kors:

275 g (500 ml, ongesif afgemeet) koekmeelblom

10 ml bakpoeier

2 ml sout

100 g (110 ml) botter of margarien, by kamertemperatuur.

Ongeveer 100 ml koue water

Metode:

Braai die ui in ‘n kastrol oor matige hitte in die olie tot sag. Voeg die maalvleis by, roer dit met ‘n vurk los en braai dit tot gaar. Voeg nou die kerriepoeier, sout, tamatiesous en blatjang by en braai vir ‘n verdere 5 minute. Maak nou die mielieblom aan met ‘n bietjie koue water tot ‘n pasta en voeg dit by die maalvleis. Roer goed deur en laat dit dik word. Laat nou die vulsel afkoel.

Sif die koekmeelblom, bakpoeier en sout saam. Vryf die botter of margarien in die meelmengsel in. Sny die water met ‘n spatula in die mengsel in tot ‘n stywe deeg vorm.

Rol die deeg uit op ‘n meelbestrooide oppervlak. Druk sirkels, 9 cm in  deursnee, uit die deeg. Hiervoor het ek sommer een van my ma se vrugtevles deksels gebruik.

Skep nou 'n teelepel vulsel op elke sirkel. Maak die rande van die deegsirkels met koue water klam. Vou die helfte van die deegsirkel oor die vulsel en druk die boonste rand styf op die onderste rand vas.

Braai die tertjies in warm, diep kookolie tot uitgerys en goudbruin. Dreineer hulle op kombuispapier, laat dit effens afkoel en geniet!